Minneapolis- Golaha Guddiga Siyaasadda iyo Horumarinta Guriyeynta Magaalada Minneapolis ayaa maalintii Arbacada u codeeyay , magacaabayna Sharmarke Maxamed  Ciise in uu xubin rasmi ah ka noqdo Guddiga Maamulka Guryahay Dadweynaha Minneapolis.

Sidoo kale Sharmake M. Ciise ayaa loo doortay in uu noqdo Guddoomiyaha Guddiga Maamula Guryahay Dadweynaha Minneapolis.

Duqa magaalada Minneapolis Jacob Frey ayaa Sharmarke M. Ciise u magacaabay in uu xubin ka noqdo guddigan. Haddaba waxaa Sharmaarke u codeeyay oo taageeray 4 kamid ah Gollaha Guddiga Siyaasadda iyo Horumarinta Guriyeynta magaalada Minneapolis, halka 1 qof oo gudiga kamid ahi uu codka u diiday Sharmaarke.

Sharmarke Maxamed Ciise oo ah 37-jir ayaa ah xubin muhiim ah oo ka tirsan bulshadda Soomaaliyeed ee ganacsatada ah. Sharmaake ayaa ah aqoon yahay takhasus iyo khibrad waayo aragnimo u leh ganacsiga iyo qorsheynta.

Sharmarke M. Ciise oo loo magacaabay in uu noqdo Guddoomiyaha Guddiga Maamula Guryahay Dadweynaha Minneapolis.

Sharmarke ayaa isagu ku koray magaalada Minneapolis, gaar ahaan xaafada Cedar oo ah xaafada ay deggan yihiin dad weynaha Soomaaliyeed ee ugu badan ee ku dhaqan magaalada Minneapolis.

Sidoo kale Sharmarke ayaa noqonaya qofkii ugu horreeyey ee Soomali ah ama ka soo jeeda qaarada Afrika ee hoggaamiya Guddiga Hay’adda Guryaha Dadweynaha ee magaalada Minneapolis iyo guud ahaanba magaalooyinka waa weyn eek u yaala dalka Maraykanka.

Cabdi Salah oo ku magacdheer Abdulquduus Donyale oo kala talliya Duqa magaalada Minneapolis howlaha guud iyo gaadiidka, isla markaana ah xiriirka u dhaxeeya magaalada iyo Hay’adda Guryaha Dadweynaha ee magaalada Minneapolis ayaa magaabistaan aad u soo dhaweeyay.

“Waxaan baadigoobeynay shaqsi le aqoon iyo waayo aragnimo la xiriirta guriyeynta, isla markaana ka tarjumi karo aragtida dadka ku nool guryahan. Waxaan kalsooni badan ku qabnaa, in uu Sharmarke ka soo bixi karo xilka loo igmaday” ayuu yiri Cabdi Salah (Cabdiquduus) oo isagu kamid ah hogaamiyeyaasha Soomaaliyeed, kana shaqeeya xafiiska ugu sareeya magaalada, waa xafiiska duqa magaalada Minneapolis Jacob Frey oo isagu xilkan u magacaabay Sharmarke.

Haddaba waxaa la sugayaa in Gollaha Magaalada Minneapolis ay u codeeyaan ama ay xaqiijiyaan magacaabista Sharmarke kulan ay leeyihiin maalinta Jimcaha, May 17, 2019.

Xafiiska looga arrimiyo Hay’adda Guryaha Dadweynaha ee magaalada Minneapolis.

Guddiga uu Sharmarke Guddoomin doono iyo Hay’adda Guryaha Dadweynaha ee magaalada Minneapolis ayaa maamula 5,000 oo ah guryaha dadweynaha, 42 guri oo ah dabaqyadda dhaadheer iyo 700 oo guri oo ah kuwa loogu talagalay hal halka qoys.

Guddigan ayaa sidoo kale maamula dhaqaalaha iyo shahaadooyinka loo yaqaano Section 8 foojarris oo ah nidaam dhaqaale ahaan taageera dadka aan awoodin in ay la baxaan kirada guryaha. Shahaadooyinka iyo ogolonaanshaha Section 8 foojarris ayaa loogu talagalay in lagu kiraysto guryahay, waxaana isticmaala ama loo ogolyahay in ay ka faa’idaystan in ka badan 5,000 oo qof oo deggan magaalada Minneapolis.

Hadii maalinta Jimcaha ay Gollaha Guddiga Guurtida Minneapolis ay xaqiijiyaan, taageeraana magacaabista Sharmarke, wuxuu guddoomin doonaa guddi sagaal xubnood ah, guddigan oo dejiya miisaaniyadda iyo siyaasadda uu wax ku maamulo oo agaasimaha shaqo fulinta u qaabilsan Hay’adda Guryaha Dadweynaha ee magaalada Minneapolis. Miisaaniyadda hay’adaha guryaha dadweynaha ee Minneapolis ayaa ahayd $107 milyan sannadkii 2018.

Magacaabista Sharmarke M. Ciise ayaa ah mid muhiin u ah bulshadda Soomaaliyeed ee ku dhaqan magaalada Minneapolis, maadama ay Soomaalida deggan magaalada Minneapolis ay intooda badani deggan yihiin guryaha ay maamusho Hay’adda Guryaha Dadweynaha ee magaalada Minneapolis ama guryo qaata Section 8 foojarris ay magaaladu bixiso, aqbashana.