Ra’iisul wasaare Xasan oo gaaray Cabudwaaq+Sawiro

Xasan Cali Khayre Ra’iisul wasaaraha Xukuumadda Soomaaliya iyo wafdi uu hogaaminayo ayaa galabta safar dhulka ah uga ambabaxay degmada Cadaado ee Gobolka Galgaduud waxayna isla galabtaba gaareen degmada Cabudwaaq ee Gobolka Galgaduud iyadoo halkaas si heer sare ah loogu soo dhaweeyay Wafdiga Ra’iisul wasaaraha Soomaaliya.

Degmada Cabudwaaq ayaa waxaa Ra’iisul wasaaraha Xukuumadda Soomaaliya Xasan Cali Khayre ku soo dhaweeyay shacabka degmada oo aan ukala harin soo dhaweynta wafdiga iyo Madaxweyne ku xigeenka Maamulka Galmudug Maxamed Xaashi Cabdi Carabay,wasiiro,Xildhibaano iyo Gudoomiyaha degmada Cabudwaaq.

Xasan Cali Khayre ayaa meel fagaaro ah khudbad ugu jeediyay mas,uuliyiinta iyo shacabka Cabudwaaq wuxuuna ugu mahadceliyay soo dhaweynta ay usameeyeen asaga iyo wafdigiisa ee Cabudwaaq ugu yimid wuxuuna usheegay in fariin ugu sido Madaxweynaha Jamhuuriyadda federaalka Soomaaliya Maxamed Cabdulaahi Farmaajo oo ah in reer Cabudwaaq ka shaqeeyaan midnimada Galmudug iyo sidii loo heli lahaa maamul loo dhan yahay.

Ra’iisul wasaaraha Xukuumadda Soomaaliya ayaa ka codsaday bulshada Cabudwaaq inay garab ku siiyaan sidii loo dhisi lahaa Maamulka Galmudug oo sal adag leh islamarkaana si cadaalad ah ugu ushaqeeya bulshada reer galmudug.

“Waxaan idinkugu imid inaan idinla dhiso Galmudug nabad ah,laga daaweeyay khilaafkii ragaadiyay,wadajir ah oo ah maamul loo dhanyahay sidoo kale xariir wanaagsan la leh dowladda federaalka” ayuu usheegay Ra’iisul wasaaraha Soomaaliya bulshada Cabudwaaq.

Xasan Cali Khayre ayaa inta uu ku sugan yahay Cabudwaaq waxaa uu lakulmi doonaa odayaasha,waxgaradka iyo siyaasiyiinta Cabudwaaq si rabitaankooda ugu sheegaan Ra’iisul wasaaraha.

Horay Ra’iisul wasaaraha Xukuumadda Soomaaliya Xasan Cali Khayre ayaa waxaa habeeno uu ku hoyday Dhuusa-Mareeb iyadoo Odayaasha iyo Madaxda Ahlusunna ee degmadaas la qaatay shirar kala duwan kuna saabsanaa arimaha doorashada Galmudug ka dibna wuxuu utallaabay Cadaado halkaas Xasan Cali Khayre wuxuu kula kulmay Madaxweynaha Galmudug iyo Odayaasha reer Galmudug waxayna ka wadahadleen habka loo marayo doorashada Maamulka Galmudug.